કેન્દ્ર સરકારે સુપ્રિમ કોર્ટમાં સોગંદનામું રજૂ કર્યું…
આપત્તિ અધિનિયમ હેઠળ ફરજિયાત વળતર માત્ર ધરતીકંપ, પૂર વગેરે કુદરતી આફતોને લાગુ પડે છે…
ન્યુ દિલ્હી : સુપ્રીમ કોર્ટે કોરોના ચેપથી મૃત્યુ પામેલા લોકોનાં સગાઓને વળતર માટેની અરજી પર કેન્દ્ર સરકારનો જવાબ માંગ્યો હતો. હવે કેન્દ્ર સરકારે સુપ્રીમ કોર્ટમાં સોગંદનામું આપીને તેનો જવાબ આપ્યો છે. કેન્દ્ર સરકારે સોગંદનામામાં કહ્યું હતું કે, કોરોનાને કારણે પોતાનો જીવ ગુમાવનારાઓના પરિવારને રૂ .૪ લાખનું વળતર આપવું શક્ય નથી. કેન્દ્ર સરકારે તેના જવાબમાં કહ્યું છે કે દરેક કોરોના ચેપગ્રસ્ત દર્દીના મોતનું વળતર એ રાજ્યોની આર્થિક ક્ષમતાથી વધુ છે.
સુપ્રીમ કોર્ટને આપેલા સોગંદનામામાં, કેન્દ્ર સરકારે કહ્યું કે આપત્તિ અધિનિયમ હેઠળ ફરજિયાત વળતર માત્ર ધરતીકંપ, પૂર વગેરે કુદરતી આફતોને લાગુ પડે છે. સરકારે તેના જવાબમાં એમ પણ કહ્યું હતું કે જો કોઈ એક રોગને લીધે મૃત્યુ પર વળતર આપવામાં આવે છે અને બીજી બીમારી પર નહીં તો તે ખોટું હશે. તમને જણાવી દઈએ કે સુપ્રીમ કોર્ટમાં અરજી દાખલ કરીને કોરોના ચેપથી મૃત્યુ પામેલા લોકોનાં પરિવારો માટે ૪ લાખ રૂપિયા વળતરની માંગ કરવામાં આવી છે.
કેન્દ્ર સરકારે સુપ્રીમ કોર્ટને આપેલા જવાબમાં કહ્યું હતું કે કુદરતી આફતો માટેના વળતરને કોરોના રોગચાળા પર લાગુ કરવું કોઈપણ રીતે યોગ્ય રહેશે નહીં. આવકમાં ઘટાડો અને આરોગ્ય ખર્ચમાં વધારાને કારણે કેન્દ્ર સરકાર અને રાજ્યો પહેલાથી જ આર્થિક દબાણ હેઠળ છે. વળતર ચૂકવવા માટે સંસાધનોનો ઉપયોગ મહામારી સામે કાર્યવાહી અને આરોગ્ય ખર્ચને અસર કરી શકે છે. કોરોના રોગચાળાને કારણે અત્યાર સુધીમાં ૩,૮૫,૦૦૦થી વધુ લોકોનાં મોત નીપજ્યાં છે, જેમાં વધુ વધારો થવાની સંભાવના છે.
સોગંદનામામાં કેન્દ્ર સરકારે કહ્યું છે કે સુપ્રીમ કોર્ટે પહેલેથી જ સ્પષ્ટ કરી દીધું છે કે નીતિ બાબતો કાર્યપાલિકા પર છોડી દેવી જોઇએ અને ન્યાયતંત્ર વહીવટી વતી નિર્ણય લઈ શકતું નથી. કોરોના પીડિતો માટે મૃત્યુના પ્રમાણપત્રો પર સરકારે કહ્યું કે કોવિડ -૧૯ ચેપને કારણે થતાં મૃત્યુને મૃત્યુ પ્રમાણપત્રોમાં કોવિડ મૃત્યુ તરીકે પ્રમાણિત કરવામાં આવશે. કોવિડ મોતને પ્રમાણિત કરવામાં નિષ્ફળતા માટે સંબંધિત ડોકટરો સામે શિક્ષાત્મક કાર્યવાહી પણ કરવામાં આવશે.
