કોરોના સંકટમાં ૪-જી કનેક્ટિવિટી ડિજિટલ લાઇફલાઇન સાબિત થઈ…
મુંબઇ : દિગ્ગજ ઉદ્યોગપતિ મુકેશ અંબાણી ‘૫G’ ક્રાંતિલઇને આવી રહ્યા છે. આ સંદર્ભે તેમણે એક કાર્યક્રમમાં આ અંગે વધારાની માહિતી આપી હતી. ઈન્ડિયા મોબાઈલ કોંગ્રેસના કાર્યક્રમને સંબોધતા અબજોપતિ મુકેશ અંબાણીએ કહ્યું કે રિલાયન્સ જિયો ૨૦૨૧ ના બીજા ભાગમાં ૫G સેવા શરૂ કરવાની તડામાર તૈયારીઓ કરી રહ્યું છે.
આ માટે, જો કે, નીતિમાં પરિવર્તન અને પ્રક્રિયાને વેગ આપવાની જરૂર છે. તેમણે કહ્યું કે જ્યાં સુધી નીતિ સરળ અને સસ્તી નહીં હોય તે શક્ય નહીં હોય.
મુકેશ અંબાણીએ કહ્યું કે ૨૦૨૧માં જિયો ભારતમાં ૫ જી ક્રાંતિ લાવશે. આખું નેટવર્ક સ્વદેશી હશે. આ સિવાય હાર્ડવેર અને ટેકનોલોજી પણ સ્વદેશી હશે. તેના દ્વારા આપણે આત્મનિર્ભર ભારતનું સપનું પૂર્ણ કરીશું.
તેમણે કહ્યું કે ભારતે ૫ જી સ્પેક્ટ્રમ અંગે વહેલી તકે નિર્ણય લેવો જોઈએ. સાથે તેઓએ એમ પણ કહ્યું કે Jio 5G ક્રાંતિનું નેતૃત્વ કરશે. અંબાણીએ આગળ કહ્યું કે, આગામી દિવસોમાં ભારત સેમી-કંડક્ટરનું ઉત્પાદન કેન્દ્ર બની શકે છે. અમે ફક્ત સેમી-કંડક્ટરની આયાત પર આધાર રાખી શકતા નથી.
દેશમાં હાલમાં ૩ કરોડ ૨ G ફોન યુઝર્સ છે. આ લોકો માટે સ્માર્ટફોન સુધી પહોંચવુ જરૂરી છે અને આ માટે, નીતિ હસ્તક્ષેપની જરૂર છે. અંબાણીએ કહ્યું કે અમે ડિજિટલી સારી રીતે જોડાયેલ છે, આમ હોવા છતાં ૩૦૦ મિલિયન લોકો હજી પણ ૨ જી સ્માર્ટફોનનો ઉપયોગ કરી રહ્યાં છે.
