મુંબઈ,
ભારે વરસાદ બાદ મુંબઈના ડોંગરી વિસ્તારમાં ચાર માળની ઈમારત તૂટી પડી છે. આ બિલ્ડિંગના કાટમાળમાં ૪૦ લોકો દબાયા હોવાની આશંકા છે.
ટીવી રિપોર્ટ્સ અનુસાર, આ દુર્ઘટનામાં ૧૨ લોકોનાં મોત થયા છે. હાલ ઘટનાસ્થળ પર એનડીઆરએફ, ફાયર બ્રિગેડ અને પોલીસ દ્વારા ફસાયેલા લોકોને બહાર કાઢવામાં આવી રહ્યા છે. એમ્બ્યુલન્સ સહિતના રેસ્કયુ વાહનો પણ તૈનાત છે. ડોંગરીમાં આવેલી આ બિલ્ડિંગ ૧૧.૪૦ કલાકે તૂટી પડી હતી. કાટમાળમાંથી બચાવકર્મીઓએ એક બાળકને બચાવી લઈને તેને હોસ્પિટલ મોકલી આપ્યું છે. અન્ય ફસાયેલા લોકોને બચાવવાની કામગીરી ચાલુ છે.
સરકારી સૂત્રોના જણાવ્યા અનુસાર, ડોંગરી વિસ્તારમાં કૌસરબાગ નામની ચાર માળની બિલ્ડિંગ તૂટી પડી છે. બિલ્ડિંગ સાંકડી ગલીમાં આવવાના કારણે બચાવ કાર્યમાં પણ પારાવાર મુશ્કેલી આવી રહી છે. ગલીમાં ફાયર બ્રિગેડના વાહનો પણ પ્રવેશી શકે તેમ નથી. જેના કારણે બચાવકર્મીઓને પગપાળા જ તમામ કામગીરી કરવી પડી રહી છે.
