આણંદ : અરબી સમુદ્રમાં સર્જાયેલાં લો પ્રેશરના કારણે સૌરાષ્ટ્ર પંથકમાં વરસાદી ઝાપટાંનો દૌર જોવા મળ્યો છે. ચરોતર પંથકમાં પણ શુક્રવાર રાતથી હળવા વાદળો છવાતાં ખેડૂતોમાં ચિંતા વ્યાપી છે. જ્યારે આણંદ કૃષિ.યુનિના હવામાન વિભાગ જણાવ્યા અનુસાર અાગામી 2 દિવસોમાં વરસાદની કોઇ સંભાવના નથી. અાગામી 22મી ઓક્ટોબરે આણંદ-ખેડા જિલ્લા સહિત મધ્યગુજરાતના કેટલા વિસ્તારોમાં હળવા વરસાદી ઝાપટાં પડવાની સંભાવના વ્યક્ત કરાઈ છે.
ગુજરાતમાં ચાલુ વર્ષે સરેરાશ વરસાદ કરતા ઘણો વધારે વરસાદ વરસ્યો છે. ત્યારે અરબી સમુદ્રમાં સર્જાયેલા અપર એર સરક્યુલેશનના કારણે આણંદ-ખેડા સહિત મધ્યગુજરાતના વાતાવરણમાં એકા-એક પલટો જોવા મળ્યો હતો. અને શનિવારે વહેલી સવારથી પંથકમાં વાદળછાયું વાતાવરણ રહેતાં ખેડૂતોમાં ચિંતા વ્યાપી ગઇ હતી. અત્રે ઉલ્લેખનીય છે કે, આણંદ-ખેડા જિલ્લા સહિત સમગ્ર પંથકમાં મોડી રાત્રે ઠંડની અસર વર્તાવા લાગી છે. શનિવારે જિલ્લાનું મહત્તમ તાપમાન 34.5 ડિગ્રી નોધાયું હતું. જ્યારે લઘુત્તમ તાપમાન 22.5 ડિગ્રી નોંધાયું હતું.
