ઓડ પાલિકા પ્રમુખપદની ચૂંટણી બાદ ખેલાયું દંગલ : પોલીસે રાયોટિંગનો ગુન્હો નોંધ્યો…

પ્રાપ્ત માહિતી મુજબ ઓડ નગરપાલિકામાં પ્રમુખપદની ચૂંટણી બાદ કોંગ્રેસ તરફીઓના હાથમાંથી સત્તા સરકી ગઈ હતી અને ભાજપના ગોપાલસિંહ રાઉલજીએ નગરપાલિકાની સત્તા પુનઃ મેળવતા ઓડ નગરનું એક જૂથ ગદ્દારી કર્યાની રિષ રાખી સામા જૂથ તરફ આક્ષેપબાજી કરતુ હતું.તેમાંથી તણખો ઝરતા ગઈકાલે બાવાજીની ખડકી પાસે બન્ને જૂથના યુવાનો વચ્ચે મારક હથિયારો સાથે છુટ્ટા હાથની મારામારી થઇ હતી.ઘટનાની જાણ થતા ખંભોળજ પોલીસ ઘટના સ્થળે દોડી આવી હતી,અને પરિસ્થિતિ કાબુમાં કરવા હળવો લાઠી ચાર્જ કર્યાની જાણકારી પ્રાપ્ત થઇ છે.

ઓડ નગરપાલિકાની સામાન્ય ચૂંટણીમાં ભાજપ પાસેથી કોંગ્રેસે સત્તા ઝૂંટવી લીધી હતી અને કોંગ્રેસ તરફીઓએ પ્રશાંત પટેલને પ્રમુખ તરીકે બેસાડ્યા હતા.પરંતુ દોઢ વર્ષના સમય દરમ્યાન કોંગ્રેસ તરફીઓમાં આંતરિક વિખવાદ ચરમસીમા ઉપર આવતા પ્રશાંત પટેલે રાજીનામુ આપી છ જેટલા સભ્યો સાથે ભાજપ તરફી ક્રોસ વોટિંગ કર્યું હતું. જેના કારણે ભાજપના ગોપાલસિંહ રાઉલજી વિજેતા બન્યા હતા,અને ઓડ નગરપાલિકામાં ભાજપે સત્તા મેળવી લીધી હતી,ગત સામાન્ય ચૂંટણીમાં કોંગ્રેસ તરફીઓને 16 સીટ મળી હતી જ્યારે ભાજપને માત્ર છ સીટ મળી હતી,આમ ડબલ સંખ્યામાં જીત મેળવી હોવા છતાં કોંગ્રેસને સત્તા ગુમાવવાનો વખત આવતા પટેલ કોમના એક જૂથને અન્ય જૂથે ગદ્દારી કર્યાનો રોષ હતો જે ગતરોજ ભડકી ઉઠ્યો હતો અને બાવાજીની ખડકી પાસે ગુપ્તી,ધારિયા,લાકડાના ડંડા ,ક્રિકેટબેટ જેવા મારક હથિયારો દ્વારા એકબીજા ઉપર હુમલો થયો હતો,જેમાં રતનજીની ખડકીમાં રહેતા જતીનભાઈ ઘનશ્યામભાઇ પટેલને પેટમાં ગુપ્તી જેવું હથિયાર માર્યાની તેમજ ભાવેશ પટેલને માથાના ભાગે ધારિયું તેમજ શૈલેષ પટેલને પીઠના ભાગે લાકડીઓ માર્યાની ખંભોળજ પોલીસ મથકમાં ફરિયાદ લખાવાઈ છે,પેટમાં ગુપ્તી વાગતા ઘાયલ જતીનને કરમસદની શ્રી કૃષ્ણ હોસ્પિટલમાં સારવાર માટે દાખલ કરવામાં આવેલ છે, તો સામા પક્ષે આણંદની ખાનગી હોસ્પિટલમાં સારવાર લઇ રહેલ અને ઓડ ડાકોરવાડ રહેતા વિશાંત રમણભાઈ પટેલે ઓડ નગરપાલિકાની ચૂંટણીની અદાવત રાખી જાતિવાચક અપશબ્દો બોલી ગેરકાયદેસર મંડળી રચી ગાળાગાળી કરી પોતાના માથા ઉપર લાકડાનો ડંડો મારી તેમજ દિવ્યેશ પટેલના પગના ભાગે બેટ મારી અને કપાળ ઉપર લાકડાના ડંડા થી ઇજા કર્યાની ખંભોળજ પોલીસ મથકે ફરીઆદ નોંધાવતા પી.એસ.આઈ પી.જે.પરમારે બન્ને પક્ષોની  ફરિયાદ લઇ રાયોટિંગનો ગુન્હો નોંધી  કુલ્લે 20 વ્યક્તિઓ સામે ગુન્હો નોંધી કાર્યવાહી હાથ ધરી છે.

• ઓડમાં ગતરાત્રીના થયેલ મારક હથિયારો સાથેની મારામારી વખતે ના દ્રશ્યો CCTV માં કેદ થયેલા આ  વાયરલ થયેલી ક્લિપમાં કેસરી કલરની જર્સી પહેરેલ યુવક ઉપર કેટલાક સખ્શ ડંડા અને બેટ દ્વારા હુમલો કરતા જણાઈ રહયા છે…

• Nimesh Pilun, Umreth