બપોરે ૨.૪૩ કલાકે લોન્ચીંગ : મિશન સફળ રહેવાનો ઇસરોનો દાવો : કોઇ ટેકનીકલ ખામી નહિ સર્જાય…
ચેન્નઈ,
ભારત અંતરિક્ષમાં વધુ એક ઇતિહાસ રચવાની તૈયારી કરી રહ્યું છે. ઇન્ડિયન સ્પેસ રિસર્ચ ઓર્ગેનાઇઝેશન (ISRO)ના મહત્વકાંક્ષી મિશન ચંદ્રયાન-૨ માટે આજનો દિવસ ખૂબ જ અગત્યનો છે. બપોરે ૨ કલાક ૪૩ મિનિટ પર ચંદ્રયાન-૨નું લોન્ચિંગ થવાનું છે. આની પહેલાં ઇસરો ચીફ રવિવારના રોજ સંપૂર્ણપણે આશ્વસ્ત દેખાયા. તેમણે કહ્યું કે આ મિશન સફળ રહેશે. ૧૫ જુલાઇના રોજ ક્રાયોજેનિક એન્જિનમાં લીકેજના લીધે લોન્ચિંગના થોડાંક સમય પહેલાં જ સ્થગિત કરી દેવાયું હતું.
શ્રીહરિકોટાના સ્પેસ પોર્ટ પર સોમવાર બપોરે દોઢ વાગ્યા બાદ હલચલ વધી જશે. એવું એટલા માટે કારણ કે આ સમય પર ક્રાયોજેનિક એન્જિનમાં હીલિયમ ફિલિંગનું કામ ફરીથી કરાશે. આની પહેલાં મિશન ચંદ્રયાન-૨ના લોન્ચિંગનું રિહર્સલ સફળ રહ્યું અને તેનું કાઉન્ટડાઉન રવિવાર સાંજે ૬ કલાક ૪૩ મિનિટથી શરૂ થઇ ગયું. રવિવારના રોજ શ્રીહરિકોટા પહોંચેલા ઇસરોના પ્રમુખ સિવન એ ચેન્નાઇ એરપોર્ટ પર કહ્યું કે મિશન સફળ રહેશે અને અમને આશા છે કે ચંદ્રયાન-૨ ચંદ્રમા પર કેટલીય નવી વસ્તુઓની શોધ કરવામાં સફળ રહેશે. ઇસરોએ ટ્વીટ કરીને જણાવ્યું હતું કે, જીએસએલવી માર્ક થ્રીનું લોન્ચ રિહર્સલ પૂરું થઈ ચૂકયું છે.
