સવારે ૫.૩૦ થી ૬.૩૦ વાગ્યા વચ્ચે પ્રવેશ કરવામાં આવશે…
ન્યુ દિલ્હી,
ભારતીય અંતરિક્ષ અનુસંધાન સંગઠન (ઈસરો)એ ૨૧ ઓગષ્ટે ચંદ્રયાન-૨ને ચંદ્રની બીજી કક્ષામાં સફળતાપૂર્વક પ્રવેશ કરાવી દીધો હતો. ૨૮ ઓગષ્ટે ચંદ્રયાન-૨ને ચંદ્રની ત્રીજી કક્ષામાં પ્રવેશ કરાવવામાં આવશે. ચંદ્રયાન-૨ને ચંદ્રની ત્રીજી કક્ષામાં સવારે ૫.૩૦થી ૬.૩૦ વાગ્યાની વચ્ચે પ્રવેશ કરાવવામાં આવશે. ત્યારબાદ ચંદ્રયાન-૨ ચંદ્રની ચારેય બાજુ ૧૭૮ કિમીની એપોજી અને ૧૪૧૧ કિમીની પેરીજીમાં ચક્કર લગાવશે. પરંતુ, શું તમને ખબર છે કે ચંદ્રની ચારેય બાજુ ચક્કર લગાવી રહેલા ચંદ્રયાન-૨ પર ઈસરો વૈજ્ઞાનિક નજર કેવી રીતે રાખે છે.
ઈસરોની મળતી માહિતી મુજબ ચંદ્રયાન-૨ પર નજર રાખવા માટે ઈસરો મદદ લે છે પોતાના ટેલીમેટ્રી ટ્રેકિંગ એન્ડ કમાન્ડ નેટવર્ક ISTRAC) સેન્ટરથી. આ સેન્ટરની દુનિયાભરમાં ગલભગ ૧૯ શાખાઓ છે. તેને ટેલીમેટ્રી એન્ડ ટ્રેકિંગ (TTC) સેન્ટર કહે છે. તેમાંથી ૫ શાખાઓ દેશમાં છે. આ બેંગલુરૂ, શ્રીહરિકોટા, પોર્ટ બ્લેયર, તિરૂવનંતપુરમ અને લખનઉમાં સ્થિત છે. તેની સિવાય બ્રુનેઈ, બિયાક અને મોરિશસ સહિત ૧૪ સેન્ટર્સ દુનિયાના અલગ-અલગ દેશોમાં લાગેલા છે. આ સેન્ટર્સ દિવસ-રાત ચંદ્રયાન-૨ પર ધ્યાન રાખી રહ્યાં છે.
ઈસરો વૈજ્ઞાનિકોએ ૨૦ ઓગષ્ટ એટલે મંગળવારે ચંદ્રયાન-૨ને ચંદ્રની પ્રથમ કક્ષામાં સફળતાપૂર્વક પહોંચાડ્યું હતુ. ઈસરો વૈજ્ઞાનિકોએ મંગળવારે ચંદ્રયાનની ગતિને ૧૦.૯૮ કિમી પ્રતિ સેકન્ડથી ઘટાડીને લગભગ ૧.૯૮ કિમી પ્રતિ સેકન્ડ કરી નાંખી હતી.
