કેવડિયા : ગુજરાતની જીવાદોરી સમાન સરદાર સરોવર નર્મદા ડેમની જળ સપાટીમાં ૩૮ સે.મી.નો વધારો થયો છે. નર્મદા ડેમની જળસપાટી ૧૨૧.૦૮ મીટર પર પહોંચી છે. ઉપરવાસમાંથી પાણીની ૨૩,૧૦૮ ક્યૂસેક પાણીની આવકને પગલે ડેમની સપાટીમાં હાલ નજીવો વઘારો થયો છે. નર્મદા ડેમ ખાતે હજી પણ ૧૨૦૦ મેગાવોટના રિવર બેડ પાવર હાઉસના તમામ યુનિટ બંધ છે. હાલ નર્મદા ડેમમાં ૧૪૧૩.૬૬ મિલિયન ક્યુબિક મીટર પાણીનો જથ્થો ઉપબલ્ધ છે.
આ વર્ષે ઇન્દિરાસાગર અને ઓમકારેશ્વર ડેમ હજી ભરાયા નથી. આ બંને ડેમ ભરાયા બાદ જ નર્મદા ડેમમાં પાણી છોડવામાં આવશે. જોકે હાલ નર્મદા ડેમમાં નદી-નાળાઓની પાણીની આવક થતાં ડેમની સપાટી વધી છે. નર્મદા જિલ્લાના જંગલ વિસ્તારમાં ધોધમાર વરસાદને પગલે અનેક ધોધ અને નદી-નાળાઓ છલકાયા છે અને નાંદોદ તાલુકાના જૂના ઘાંટા ગામ ખાતે આવેલા ટકારા ધોધમાં ભરપૂર પાણી આવ્યું છે. જેને પગલે ધોધના આહલાદક દ્રશ્યો સર્જાયા છે.
સરદાર સરોવર નર્મદા ડેમમાં જળ સપાટી વધીને ૧૨૧.૦૮ મીટરે પહોંચી…
