લખનઉ : ભારતના લેફ્ટ-આર્મ રિસ્ટ સ્પિનર કુલદીપ યાદવે લૉકડાઉન દરમિયાન તો થોડીઘણી પ્રૅક્ટિસ કરી જ હતી, પણ હવે તે રોજના ચાર કલાક પ્રૅક્ટિસ કરે છે. તેણે ‘પીટીઆઇ ભાષા’ને મુલાકાતમાં કહ્યું છે, ‘મેં અહીં લખનઊમાં લાલ બંગલા વિસ્તારના રોવર્સ ગ્રાઉન્ડ પર બોલિંગની પ્રૅક્ટિસ શરૂ કરી છે. હું સવારે અને સાંજે મેદાન પર જાઉં છું. સવારે ૭.૩૦થી ૯.૦૦ સુધી કસરત કરું છું અને મોટા ભાગે જિમમાં જ રહું છું.
જોકે, સાંજે ૪થી ૮ સુધીમાં બોલિંગની પ્રૅક્ટિસ જ કરું છું. બૉલ પર થૂંક લગાવ્યા વગર પ્રૅક્ટિસ કરવાનું મને ફાવી રહ્યું છે. બૉલને ચમકાવવા અને બોલિંગમાં ધારી અસર મેળવવા બૉલ પર થૂંક લગાવવાની મને નાનપણથી આદત છે, પણ આઇસીસીના નવા નિયમ મુજબ કોવિડ-૧૯ની મહામારીને ધ્યાનમાં લેતાં બૉલ પર થૂંક લગાવવાની મનાઈ છે. એ નિયમને અનુસરવાની હું ટેવ પાડી રહ્યો છું.’