USA : અમેરિકાના રાષ્ટ્રપ્રમુખ ડોનાલ્ડ ટ્રમ્પના નાના ભાઈ રોબર્ટ ટ્રમ્પનું શનિવારે રાત્રે ન્યૂયોર્કની એક હોસ્પિટલમાં નિધન થયું છે. ૭૧ વર્ષની વયે રોબર્ટ ટ્રમ્પે અંતિમ શ્વાસ લીધા. તેઓ પણ ડોનાલ્ડ ટ્રમ્પની જેમ બિઝનેસમેન હતા. શુક્રવાર જ ડોનાલ્ડ ટ્રમ્પ ભાઈના ખબરઅંતર પૂછવા હોસ્પિટલ પહોંચ્યા હતા. માહિતી પ્રમાણે, રોબર્ટ ટ્રમ્પ ગંભીર રીતે બીમાર હતા.
ડોનાલ્ડ ટ્રમ્પે નિવેદનમાં જણાવ્યું, “ખૂબ દુઃખ સાથે જણાવવાનું કે મારા વહાલા ભાઈ રોબર્ટનું આજે રાત્રે નિધન થયું છે. રોબર્ટ માત્ર મારા ભાઈ નહોતા, મારા સૌથી સારા મિત્ર પણ હતા. હું તેમને ખૂબ યાદ કરીશ. અમે ચોક્કસ ફરી મળીશું. મારા હૃદયમાં તેમની યાદો હંમેશા રહેશે.”
પ્રાપ્ત માહિતી મુજબ, રોબર્ટ ટ્રમ્પ પ્રેસિડેન્ટ ટ્રમ્પની ખૂબ નજીક હતા. તેઓ દરેક સંકટમાં પડખે રહેતા હતા. અગાઉ પણ રોબર્ટ ટ્રમ્પને ICUમાં દાખલ કરાયા હતા. રોબર્ટ અને ડોનાલ્ડ ટ્રમ્પ બંને વ્યવસાયે બિઝનેસમેન હતા પરંતુ બંનેનો સ્વભાવ એકદમ અલગ હતો. ડોનાલ્ડ ટ્રમ્પે પોતે પણ આ વાત સ્વીકારી હતી કે તેમના નાના ભાઈ વધારે શાંત અને સરળ સ્વભાવના હતા. ટ્રમ્પ તેમને પ્રેમથી ’હની’ બોલાવતા હતા.
- Naren Patel
